என் அன்னை...

கல்வி கற்பிக்கும் கலைமகளே

ஆசி அளிக்கும் அலைமகளே

மகிழ்வளிக்கும் மலைமகளே

உலகிற்கு என்னை அறிமுகம் செய்தாய்

உளமார என்மேல் அன்பைப் பொழிந்தாய்

மலர் கரங்களால் என்னை அணைத்தாய்

என் மழலை மொழி கேட்டு மகிழ்ந்தாய்

பசியால் நான் அழுதால் - என்

கண்ணீர் கண்டு நீ அழுவாய்

நிலத்தில் நான் விழுந்தால்

நொடிப் பொழுதில் நீ விரைவாய் 

ஓடி ஓடி உணவூட்டினாய்

ஆடிப் பாடி மகிழ்வித்தாய்

தேடிப் பிடித்து விளையாடினாய்

உன்  கண்ணின்  கனவுகள்  நான்

உன் வாழ்வின் வானவில்  நான் 

எனக்கென வாழ்கின்றாய்  தாயே

என் உயிரில் கலந்திட்டாய்  நீயே

அறிவுரை அளித்தாய் அன்னையாக

கலைகளைக் கற்பித்தாய் குருவாக

தோள்தட்டிக்  கொடுத்தாய் தோழியாக

மணம் கமழும்  பூவே

மனம்  கவரும் ரதியே

வாழ்வளித்தாய் எனக்கு

வாழ்வை அர்ப்பணித்தேன் உனக்கு

-    அரங்க ஸ்ரீஜா

அறிவூட்டும் ஆசிரியப் பெருமக்களுக்கு…

குரு என்னும் வார்த்தைக்கு

உருக் கொடுத்த உன்னதமே !

ஏடு தூக்கும் மாணவர்களை - நாளை

நாடு காக்கும் நல்லோராய்

சிந்தனைச் சிற்பிகளாய்

சாதனைச் செல்வங்களாய்

சுதந்திர  நாட்டிற்கு வளம்சேர்க்க

வார்த்தெடுக்கும் வள்ளலே !

அருங்கல்வியைப் போதித்து

அனுபவங்களைப் பகிர்ந்து

ஆயகலைளைக் கற்பித்து

வாழ்விற்கு வழிகாட்டும்

வாழ்வியல் புத்தகமே - உம்மை

வாழ்த்துவோம் நித்தமுமே !

எங்கள் வாழ்வுப் பயணத்தில்

ஏணிப் படியாயிருந்து

எதிர்பார்ப்பு இல்லாமல் - எங்களை

ஏற்றமடைய வைத்த ஏந்தலே !

உம் வார்த்தைகளின் வழி நடப்போம்

எம் வாழ்வதனில் தடம் பதிப்போம்

உந்தம் வழித்தோன்றல்

-அரங்க ஸ்ரீஜா

தென்றல் !

தென்றல் !!!

அசைந்தாடும் அழகிய தென்றல் வந்து !

அழகிய பெண்ணின் செவியில் நின்று !

அசரீரி போன்று ஒரு செய்தி சொன்னது !

வாழையும் மாவும் தென்றலுக்கு ஒன்றே !

ஏழையும் செல்வந்தனும் தென்றலுக்கு ஒன்றே !

வானமும் பூமியும் தென்றலுக்கு ஒன்றே !

பேதம் பார்த்துத் தென்றல் வீசுவதும் இல்லை !

மதம் பார்த்துத் தென்றல் விலகிப்போவதும் இல்லை !

மாதம் பார்த்துத் தென்றல் மறைவதும் இல்லை !

எங்கும் நிறைந்து நான் தண்மை தருகிறேன் !

பொங்கும் மனங்களில் ஆனந்தம் அளிக்கிறேன் !

ஏங்கும் இதயங்களை இதமாய்த் தொடுகிறேன் !

மெல்லிய மனங்களை வருடுகிறேன் !

செல்லத் தீண்டலால் இதம் தருகிறேன் !

மெல்ல வந்து மனம் கவர்கிறேன் !

மக்கள் மனதில் ஏன் இத்தனை பேதம் !

மாக்களும் கூட காட்டிடும் கோபம் !

பூக்களைப் போல வாழ்வோம் நாமும் !

தூது சொல்ல தென்றல் வந்தது !

சூது அழிக்க வழி சொன்னது !

கேடு காலம் இனி அழிந்தது !

தென்றலின் கூற்றைக் கேட்டு வியந்தேன் பேதை !

என்றுமே இதயங்களை வருடும் நீ ஒரு போதை !

என்றென்றும் பார் செழித்திடக் காட்டினாய் பாதை !

- அரங்க ஸ்ரீஜா 

சுதந்திர தினம்

மூவர்ணக் கொடியை
முத்தமிழ்ப் புகழை
முத்தான தேசத்தை
முத்தமிட்டே பணிகிறேன்

சுதந்திரக் காற்று
சுதேசியின் மூச்சு
சுதந்திரத்தைப் போற்றுவோம்
சுந்தர தேசத்தை வளர்ப்போம்



இந்திய நாட்டிற்கு - என்னால்
இயன்ற மெட்டு

My Piano Music of Anthem

-அரங்க ஸ்ரீஜா 

MY PENCIL ARTS

INNOCENCE WARRIOR PRINCE PRINCESS JODHA BRIDE RAJPUT PRINCESS RAJASTHANI WOMAN PRINCESS BELLE PRINCESS JASMINE PUNJABI BRIDE MY MOM SELF PORTRAIT MY DAD

குழந்தை

மழலை மொழிக்கு இணையும் உண்டோ !

மெல்லிய பூவிதழ் உன் பாதங்கள் அன்றோ !

கடவுளைப் பார்க்கும் கண்கள் உனக்கு !

கண்ணே நீ என் வாழ்வின் விளக்கு !

பட்டுக் கரங்கள் கொண்டு

தொட்டுத் தழுவினாய் இன்று

விட்டுப் பிரிதல் கண்டு

எட்டிப் பிடித்தாய் வந்து

தவழ்கின்றாய் மண்ணில்

கலந்திட்டாய் என்னில்

சிறைபிடித்தேன் கண்ணில்

எனைக் கண்டேன் உன்னில்

கொஞ்சும் உன் மொழி கேட்டு

கெஞ்சும் என் தாலாட்டு

சிங்கார நடை போட்டு

சிறு கரங்கள் நீட்டு

கண்களில் காந்தம் - உன்

கனிமொழியே என் வேதம்

நடை போடும் பாதம் - உன்

சயனங்கள் போதும்

நீ விளையாடும் அழகில் தோற்றது மயில்

நீ இளைப்பாறும் அழகுதான் எத்தனை எழில்

உன் சுந்தர நடையில் நாணியது மான்கள்

உன் கயல்விழி கண்டு ஏங்கியது மீன்கள்

இறைவன் தந்த வரமே - என்னை

இறுக அணைத்தாய் தினமே

மனக்கவலை போக்கும் உன் கரமே

மகிழ்வில் திளைத்தது என் மனமே

மகிழச் செய்தாய் என்னை

பல்லாண்டு ஆள்வாய் மண்ணை

என் உயிரில் கலந்த உன்னை

வெல்ல வைப்பேன் விண்ணை

- அரங்க ஸ்ரீஜா 

கண்ணன் என் காதலன் !!!

கண்முன் நின்றாய் - என்

கரம் பட மறைந்தாய் 

மண்ணை அளந்தாய் - என்

மனதைக் கவர்ந்தாய் 

இன்முகச் சிரிப்பால் - என்

இதயம் நிறைந்தாய் 

செந்தேன் மொழியால் - என்

செவியை நனைத்தாய் 

குழலூதி ஆநிரை மேய்த்தாய்- உன்

எழில் கொண்டு என்னை வென்றாய் 

பிஞ்சுப் பாதங்கள் -  அதில்

கொஞ்சும் சலங்கைகள் 

தாமரை விழிகள் - அதில்

ததும்பும் லீலைகள் 

உன் குழலிசையே என் விருந்து 

ஏன் பிரிகின்றாய் என்னிலிருந்து !

உன் வார்த்தைகளே என் வேதம் 

ஏன் காட்டுகின்றாய் என்மேல் கோபம் !

கார்முகில் வண்ணன் உன்னை 

கரம்பற்ற நினைத்தேன் நங்கை 

சூடிக்கொண்டாய் மெல்லிய மயிலிறகை  

சுந்தரனையடைய விரித்தேன் என் சிறகை 

உன் சிணுங்கலில் சிதைகிறேன் 

உன் சிந்தையில் மிதக்கிறேன் 

உன் பார்வையில் பசி மறந்தேன் 

உன் ஆடலில் எனை இழந்தேன் 

மோகம் கொண்ட மனம்

மோதி அலைகிறது தினம்

காதல் கொண்டது உள்ளம்

கண்ணில் பெருகுது வெள்ளம்

காற்றில் வரும் உன் ஓசை - அதைக்

கட்டித் தழுவிட ஆசை

மனம் கமழும் உன் பூமாலை

மார்போடு சூடுவேன் நாளை

விரல்கள் தீண்டிட - நான்

விழைந்தேன் நாணிட 

அணைக்கும் அழகிய கரம்

அதைப் பார்ப்பதற்கே சுகம்

கண்கவர் அழகில் மயங்கினேன் மங்கை 

கயவனே ! நீ வீரத்தில் வேங்கை 

செவ்விதழ் கொண்டு வருடினாய் என்னை 

செருக்கழிந்து சரணடைந்தேன் உன்னை 

- அரங்க ஸ்ரீஜா 

மழை !!!

மண்ணில் விழும் ஒவ்வொரு மழைத்துளியும்

மான்விழியாள் மனதை மாயக்கியதே !

என் தனிமையைப் போக்க வந்தாயோ !

உன் தண்மையை உணர்த்த விழுந்தாயோ !

விண்ணில் இருந்து நீ விழும் அழகில்

விம்மினேன் நான் வியப்பில் !

விருட்சம் வளர வருகின்றாயோ !

என் விரகத்தி போக்கப் பொழிகின்றாயோ !

மழைக்கால மேகம் ஊர்வலம் போகுதே !

விழைகிறதே மனம் உடன் செல்லவே !

உன் தீண்டலில் திகைத்தேன் !

என் துன்பங்களைத் தொலைத்தேன் !

விழும் துளிகளில் நனைவதற்கு !

விடுமுறை அளித்தேன் குடைகளுக்கு !

மின்னலும் இடியும் நண்பர்கள் உனக்கு !

மின்மினி போல் தெரிகிறாய் எனக்கு !

அடிக்கும் சாரலின் ஆனந்தத்தில் !

அடியவள் உருகினேன் அகத்தில் !

உல்லாச தூரலின்  மணத்தில் !

உற்சாகம் பெருகியது மனதில் !

தங்கம் போல் மின்னுகிறாய் !

எங்கும் செழிப்பைத் தருகிறாய் !

மண்வாசம் தந்து மனம் நிறைந்தாய் !

என்வாசல் வந்து விலகி நின்றாய் !

சில்லென்ற மழைத் துளியே !

என் சிந்தையில் நின்றாயே !

கரங்களில் பட்டு சிதருகிராயே !

கருவிழி சிவக்கச் செய்கின்றாயே ! 

பொழியும் பொது பேரானந்தம் தருகின்றாய் !

விழியில் விழுந்து வியப்பை அளிக்கின்றாய் !

தரணிதனில் தண்மை காக்கின்றாய் !

தரிசனம் தந்து உடன் மறைகின்றாய் !

தொட்டு விளையாடுகிறாய் என்னை !

கட்டித் தழுவுகிறாய் மண்ணை !

விட்டுப் பிரிந்தாய் என்னை !

எட்டிப் பிடிப்பேன் உன்னை !

 - அரங்க ஸ்ரீஜா 

கிராமம்...

பரவும் பகலவனின் கதிர் !

பசுமைப் பயிர்களின் உயிர் !

நிலத்தை உழும் ஏர் !

நிலதேவியின் தேர் !

வானுயர வளர்ந்த மரங்கள் !

வானுலகம் செல்லும் வழிகள் !

ஆநிரைகளின் கூட்டம் !

ஆண்டவனின் தோட்டம் !

உணவளிக்கும் உழவர் !

உலகத்தின் முதல்வர் !

ஊருக்கு ஓர் ஊருணி !

நீர் தரும் பேரணி !

அழகிய ஊற்றாய் அருவி !

அழகு சேர்க்கும் கருவி !

படர்ந்த வயல்வெளி !

பசுமைப் புல்வெளி !

வீரம் கொண்ட மாந்தர் !

வீரர்களில் வேந்தர் !

மனம் வீசும் தோட்டம் !

மனங்கவர் பூக்கள் கூட்டம் !

மழை தரும் மேகம் !

மயில்களின் மோகம் !

குயில் பாடும் பாட்டு !

குழந்தைக்குத் தாலாட்டு !

வாசலின் கோலங்கள் !

வர்மரின் ஓவியங்கள் !

ஊர்கோலத் திருவிழா !

ஊர்மக்களின் பெருவிழா !

வேற்றுமையில் ஒருமை !

ஒற்றுமையின் வலிமை !

 எங்கு நோக்கிலும் இனிமையான காட்சி !

இங்கு நடப்பதோ இயற்கையின் ஆட்சி !

எங்கு தேடினாலும் கிடைக்காத ஆனந்தம் !

இங்கு வாழ்ந்திட செய்திட்டேன் புண்ணியம் !

- அரங்க ஸ்ரீஜா